Уште малку работа во декупаж

Времето е променливо, облачно, врнежливо и доколку не работам нешто ќе стане депресивно... Чисто во инает на времето  - кутија за салфетки и уште една столица за надвор...

И, конечно 3D шаблон. Правен е со глет маса и како за прв пат, јас сум и повеќе од задоволна... 

Велигден

Кога моите деца би биле поголеми, мислам дека за Велигден би послужила само црвени јајца. Но, сега кога заедно се радуваме на шаренилото од бои и кога Велигден е весел празник за сите нас, заедно со мојата поголема малечка убавица се обидовме да направиме нешто интересно. Нешто излезе како што треба, нешто за жал, остана само обид, но на крајот сепак кошницата е полна, шарена и весела, баш како што треба за овој најголем ден, кога Христос Воскресе и ни донесе живот!
Еве неколку слики...

 Правени со креп хартија, по рецепт од Coolinarka

 Салфетна техника

Со силиконски печати

 Украсени со хеклани цветови

 Ова се вика „ Се што најдов по дома, залепив“.

 Јас воопшто немам талент за цртање. Овој обид нема веќе да се повтори. Користени се акрилни бои.

 Интересна идеја превземена од тука . На мене  за жал не ми успеа. Се обидов со 3 вратоврски, со прекрасни дизајни, но еве само од оваа вратоврска нешто излезе. Мислам дека нема повторно да се обидам со оваа техника.







Сепак се на се не е лошо, нели?

Ве чекам на кафе!

Пролет е, ден пред Велигден, Велика Сабота... Кафе во мојата нова шоља, тераса со новите ролетни, мирис на прекрасно цвеќе... Циганка на ѕидот ( ме фасцинира тоа што не и се гледа лицето, па можам да ја замислувам како мајка, љубовница, осамена пријателка... Зависи од моментот..., сега е Убава Циганка), последните стихови на Борхес до неа и пет украдени минути за себе...
Ве чекам на кафе!

И, еве поминаа и моите пет минути

Саксии во декупаж техника

Решив да ги освежам пластичните саксии и да и дадам некој нов шмек на пролетната тераса. Ова се  некои од саксиите кои ги правев изминативе денови.

Тоа се пластични саксии, на кои прво им е напрваена подлога од глет смеса ( дрвофикс, бела акрилна боја и вода ). На некои места има само дрвофикс, кој во комбинација со акрилна боја дава ефект на испуканост ( поевтина варијанта за Антик лак :) ). Потоа два до три слоја акрилна бела боја, салфетка и акрилен лак.

Редизајн

Не знам дали е соодветно да се нарече овој пост „Редизајн“ или би требало да кажам „Пред и Потоа?“ Ова е мој прв “капитален“ проект и се надевам нема да ми забележите за поголемиот број постирани слики... Како е да е, ова се две столици и маса најдени некаде во нечија визба, кои ги добив на подарок, како добра подлога за учење и усовршување на техниката декупаж. Учењето и мојата прва домашна задача се покажаа доста успешни, па се надевам дека ќе продолжам во таа насока.
Техниката е веќе позната - Vintage chabby chic. Акрилни бои во браон нијанска, слонова коска, бела, окер и златна, малку восок, салфетка, силиконски печати, шмиргла и лак.
Наредниве четири месици своето место ќе го најдат на терасата, а потоа ќе смислиме нешто.

                              ПРЕД

ПОТОА

 И, конечно го заслужив своето кафе

Проекти довршени и недовршени

Дали објавив дека на 20.02.2013 станав мајка по втор пат? Се роди уште една манекенка, слатка, мала и прекрасна... Заради тоа и ме немаше подолго... Некои работи беа почнати, некои започнав во меѓувреме... Станав крадец на сопствениот сон... Инсипацијата ме обзема, боите и зеленилото пролетно не ми дозволуваат да спијам...Сепак и мојот Живот (Зоја) е прекрасно бебе, кое уште повеќе ме полни со енергија.
Сите овие слики се обиди за декупаж на различни подлоги, освен капчето за Зоја. Зборувам за декупаж на картонска каутија, топчиња од дас маса претворени во ѓердан, декупаж на рамка од дрво и на стаклена тегла. Јас лично најмоногу сум задоволна од ѓерданот, додека сите други работи се само обиди...

Ова се привезоци и обетки од дас маса кои ќе почекаат додека да бидат декупажирани.

Во момнетот работам на саксии и делови од мебел со декупаж, кои се надевам ќе бидат завршени за најмногу една недела од сега ( си дадов рок до Велигден - 5 Мај ) за кои ќе бидете навреме информирани.

Три рамки во декупаж и една кутија за чевли

Фотографиите се со најлош квалитет, но сликани се со мобилен телефон :(
Првата е обоена со акрилна боја и потоа само е нанесен шаблон со златна боја, втората е со класичен декупаж во салфетна техника и кај последната направив обид за распукување со неразреден дрвофикс, но еве мене не ми успеа. На крајот излезе како да ставив една врз друга боја

Ова е обична кутија за чевли, обоена со бела акрилна боја и нанесен мотиф од салфетка. Она што не го препознавате како златна нијанса на горниот дел е неуспешен шаблон
Еден совет во врска со боењето на поголема површина - УПОТРЕБУВАЈТЕ СУНЃЕР ИЛИ ВАЉАК,  четката остава траги и се добиваат груби и забележливи остатоци од движењето на четката. Како и да е, ова е прва обработена кутија и во неа ќе се сместат салфетките.